Bíða gull og grænir skógar þeirra sem verða gjaldþrota?

Ég hafði varla staðið upp frá lyklaborðinu, eftir að hafa nöldrað yfir vandræðagangi Seðlabankans. Hann kynni engin ráð við efnahagsvandanum annan en þann að hækka stýrivexti. Já, ég hafði rétt lokið pistlinum þegar sjálfur forsætisráðherrann kom í fjölmiðla og var sama sinnis og Þjóðviljinn. Seðlabankinn ætti að lækka vexti á næstunni. Ég ræð að vísu engu um það, bætti hann við og átti þá við ríkisstjórnina í heild.

Ekki trúi ég að forsætisráðherrann liggi yfir bloggsíðum, en merkileg er þessi tilviljun. Kannski hann sé að sjá ljósið? Ég taldi vandlifað um þessar mundir. Rétt eftir að forsætisráðherrann sagði skoðun sína, flutti "merkur fræðimaður" erindi í Háskólanum og sagði að allt færi til andskotans á næstu tveimur árum og ætti að fara þangað. Eftir það færi landið að rísa. Bankarnir væru dauðir - og í guðanna bænum ekki tengjast evrunni. Látið fólk og fyrirtæki verða gjaldþrota, þá lagast ástandið,  sagði hann en nefndi ekki það gull eða grænu skóga sem biði þeirra er yrðu gjaldþrota.

Ekki var þessi boðskapur til að hækka risið á landanum. Aftur á móti sagði frá því í fréttum  áðan (hádegi 6. maí) að bankarnir væru ekki dauðari en svo að skuldatryggingarálagið erlendis færi nú lækkandi og þeim stæðu til boða lán, sem þeir hefðu ekki einu sinni beðið um. Einn "greiningargúrúinn" lét hafa eftir sér að ástandið væri að lagast.

Það er ekki bara vandlifað, efnahagsleg tilvera þjóðarinnar verður því torskildari sem fleiri "sérfræðingar" segja álit sitt - að ekki sé nú minnst á stjórnmálamennina.

Sjá einnig: http://www.blog.central.is  

hágé. 

Athugasemdir

[Hrafn Malmquist (IP-tala skráð) 9.5.2008 kl. 11:32]

Sælir Helgi

Við Eggjarmenn fengum að birta pistil þinn Vandlifað og kann ég þér góðar þakkir fyrir. Þrátt fyrir yfirlýsingar Davíðs er ég þó ekki sannfærður um ágæti þess að lækka stýrisvexti. Sjá nánar hér.

[Helgi Guðmundsson (IP-tala skráð) 9.5.2008 kl. 15:26]

Sæll.

Ég hef í rauninni enga sérstaka skoðun á háum eða lágum stýrivöxtum. Aftur á móti tek ég eftir því mikla misræmi sem er í því sem menn segja, einn "sérfræðingurinn" segir þetta og annar hitt og allir eru svo sannfærandi að stóri sannleikur virðist leika við þá. Og enn meiri áhuga hef ég á því sem menn segja og spá um það sem á að gerast ef þetta eða hitt er gert (td. hækkun eða lækkun stýrivaxta) og því sem raunverulega gerist. "Greiningar" og spár eru fyrir mér eins og hver annar brandari. Það sem sagt er og á að vera sannlekur að morgni er orðið tóm della að kvöldi.

Kveðja.

hágé. 

[Hrafn Malmquist (IP-tala skráð) 9.5.2008 kl. 19:59]

Sæll Helgi

Ég gæti ekki verið meir sammála þér varðandi þá hugtakaflóru sem enginn virðist kunna skil á nema hann hafi tekið nokkra kúrsa í háskólanum í hagfræði/viðskiptafræði sem er ráðandi orðræða stjórnmála- og viðskiptamanna. Hver hafði nokkru sinni heyrt minnst á þjóðarsjóð áður en Björgólfur, óskabarn þjóðarinnar, ljáði því máls á dögunum....

Svarið við þessum krónuvanda held ég að sé einfaldlega evran.

[Helgi Guðmundsson (IP-tala skráð) 9.5.2008 kl. 21:45]

Sæll aftur.

Evran blessunin -  er hún lausn á miklum vanda? Ég hef haft gaman af að lesa dönsk blöð um þessar mundir. Danska krónan er tengd evrunni. Hvað skyldu Danir vera að ræða þessa daga? Jú, þann mikla vanda sem steðjar að dönskum bönkum um þessar mundir: lánsfjárkreppa, jafn alþjóðleg og hér á landi. Hvernig er aðstæðurnar á Evrusvæðinu sjálfu? Lánsfjárkreppa! Út um alt hafa menn tapað ógrynni fjár á asnaskap í bandarískum bönkum og sjóðum sem birtist í lánsfjárkreppu. Það vantar peninga. Vandinn er heldur meiri hér en annarstaðar, en mér virðist gjaldmiðill hvað sem hann heitir ekki skipta höfuðmáli (dollarinn hefur kolfallið). Það er svo aftur allt annað mál að "tapið" á húsnæðislánum í Bandaríkjunum minnir mig á ástandið hjá bandarískum bændum á sinni tíð. Bankarnir "töpuðu" á að lána smábændunum, en fyrir einhverja undarlega "tilviljun" eignuðust þeir jarðirnar þegar bændur gátu ekki staðið í skilum. Bankarnir störtuðu miklum verksmiðju- og stórbúskap. Því skyldu þeir ekki leysa íbúðirnar sem þeir eiga að hafa tapað á til sín, leigja íbúunum á verði sem í bili yrði eitthvað lægra en samanlagðar vaxtagreiðslur og afborganir? Þannig myndu þeir halda áfram að ávaxta sitt pund. Veit að inn í alþjóðlegan fjármálaheim koma miklu fleiri áhrifaþættir, vaxandi efnahagsveldi Kína sem fjármagnar m.a. Íraksstríðið fyrir USA. Vel má vera að evran verði einhverntíma til bóta, en ég hef ekki trú á neinum patentlausnum.

Bestu kveðjur.

hágé.